Djawisedjati

Pepiling Kanggo Sedulur Kabeh...

2012-02-03T15:19:00.000-08:00

URIP OJO NGONGSO
SING PODO NARIMO
GEMI SETITI NASTITI NGATI- ATI
ELING LAWAN GUSTI KANG MURBENG DUMADI

OJO MELIK DUWEKING LIYAN
OJO NGGEGE MONGSO
OJO ADIGANG ADIGUNG ADIGUNO
OJO ROMONGSO BISO
OJO SULOYO KARO TONGGO
OJO SULOYO KARO KANCA

REJEKI / JODO / PATI URIP SEKO KARESANGIN ALLAH
SING PADA SEMELEH
SABAR LAN TAWAKAL

AYO SREGEP NGIBADAH
MUGO DADI UMAT KANG TANSAH ELING

Lumiting Asmoro

2011-06-01T03:08:00.000-07:00

Lirik Lagu Lumiting Asmoro :

Seprene nggonku ngenteni janji
Iki prasetyaning ati
Kadung tresno ning sliramu duh cah bagus
Ra eling dino lan wektu

Ning ati katon ra biso ilang soyo suwe soyo ra karuan
Snadyan mung tansah anggadhang aku samar yen sliramu ra kelingan

Wong bagus tak anti-anti
Jo pijer semoyo wae
Aku tresno karo kowe. . .

Tegane atimu soyo gawe loro iku ra prayogo

Aku ora bakal mundur. . . .
Aku ora bakal mlayu. . .
Yen durung nyanding sliramu
Ukuraning tresno dudu bondho nanging lungiting asmoro

Mugi-mugi paring manpangat ^^

Lirik Lagu Tresno Sudro

2011-05-30T06:36:00.000-07:00

Menika wonten salah satunggaling lirik lagu campursari : Tresno Sudro.

Abote wong nandang tresno
tak belani nganti tekan pati
tresnaku mung kanggo siro
kusumo hayu sing merak ati
awan nengi ra biso lali tansah eling esemu
nganti kapan aku ra ngerti
iso nyanding sliramu

*

Abote dadi wong sudro
tresno tulus ora dipercoyo
wong tuwo ngumbar sujono
tansah ngiro aku wong durjono
pancen dalan sing tak liwati
ngalor ngidul mung bentul
paribasan turu klesetan
uripku tansah cedak pacoban

Cah ayu..2x
Tak enteni lilane wong tuwamu maringke kowe
sing sabar2x
Yo tresnaku ing tembe mburi bakal dadi dukwekku
Duh gusti sing tak puji paringono dalan kanggo tresnaku

Neptune Dino Jowo

2011-05-19T05:17:00.000-07:00

NEPTUNE DINO :
Senin : 4
Seloso : 3
Rebu : 7
Kemis : 8
Jum'ah : 6
Sabtu : 9
Ahad : 5

NEPTU PASARAN :
Legi : 5
Paing : 9
Pon : 7
Wage : 4
Kliwon : 8

BAB PETUNG 1_A
Wetone penganten lanang wadon,neptune dina lan pasaran ditambah banjur dibagi 4,turah pira,
yen turah:
1.Gentho,larang anak
2.Gembili,sugih anak
3.Sri,sugih rejeki
4.Punggel,mati siji

KET:
Saumpama wetone penganten lanang,Jum'ah Pon,neptune 6 lan 7=13. Penganten wadon Kemis Paing neptune 8 lan 9=17. Gunggung 13 lan 17=30. Kabagi 4-4 turah 2,tiba gembili,sugih anak. Iku becik.

PETUNG B
Wetone panganten lanang wadon

ahad lan ahad, kerep lara
ahad lan senen, sugih lara
ahad lan selasa, melarat
ahad lan rebo, yuwana
ahad lan kemis, padu
ahad lan jum'at, yuwana
ahad lan sabtu, mlarat
Senin lan senen, ala
Senin lan selasa, yuwana
Senin lan Rebo, anake wadon
Senin lan kemis, disihi wong
Senin lan Jum'at, yuwana
Senin lan Sabtu, brekat
Selasa lan selasa, ala
Selasa lan Rebo, sugih
Selasa lan Kemis, sugih
Selasa lan Jum'at, pegat
Selasa lan Setu, kerep padu
Rebo lan Rebo, ala
Rebo lan Kemis, yuwana
Rebo lan Jum'at, yuwana
Rebo lan Setu, becik
Kemis lan Kemis, yuwana
Kemis lan Jum'at,yuwana
Kemis lan Setu, pegat
Jum'at lan Jum'at, mlarat
Jum'at lan Setu, cilaka
Setu lan Setu, ala

Candrane Alam

2011-05-19T04:59:00.000-07:00

Candrane Alam utawi mongso bilih sampun dipunmangertosi, ananging lanngkung sae malih kawula serat wonten mriki :

Candrane alam(mangsa)

Mangsa Kasa : Satya murco soko ing embanan.Tundane :kekoyo podo brindil,gegodongan pada gogrok(22juni-1agustus)41 dino
Mangsa Karo : Bantala rengka.Tundane:lemah pada nelo(2agts-24agts)23 dino.
Mangsa Katelu : Suta manut ing bapa.Tuladhane:lung-lungan padha mrambat ing lanjarane/uwi,gadung lsp.(25agts-17sept)24 dina.
Mangsa Kapat : Waspa kumembeng jroning kalbu.Tundane:sumber padha pepet(18sept-12oktb)24 dina
Mangsa Kalima : Pancuran emas sumawur ing jagad raya.Tundane:wiwit ana udan(13oktb-8nopb)27 dina.
Mangsa Kanem : Rasa mulya kasucian.Tundane:woh-wohan padha nedheng-nedenge mateng(9nop-2des)42 dina.
Mangsa Kapitu : Wisa kentir ing maruta.Tundane:akeh lelara udan deres ngrejeh(22des-2feb)43 dina.
Mangsa Kawolu : Anjrah jroning kayun.Tundane:kucing padha gandhik(3fep-28/29feb)26/27 dina.
Mangsa Kasanga : Wedaring wacana mulya.Tundhane:gangsir padha ngentir,gareng padha ngareng(1mart-25mart)25 dina.
Mangsa Kasepuluh : Godhong mineb jroning kalbu.Tundane:kewan padha meteng(26mart-18aprl)24 dina.
Mangsa Destha : Tundane:manuk padha glogoh(19aprl-11mei)23 dina.
Mangsa Sadha : Mangsa mbediding/adem(12mei-21juni)41 dina.

Mugi-mugi paring manpangat...^^

Seratan Jawi

2011-05-19T04:41:00.000-07:00

SERATAN JAWI

Kawruh basa kanggo ngelingake tembung saka basa jawa kang wis ora lumrah diucapake
Kabenan - kebanjiran
Gisik - pantai
Nuweni - menjenguk
Kancil - pelanduk
Kesupen - lupa
Ajen ingajenan - saling menghargai
Di wadani - di ece, di kritik
Wasis – pinter

Atur pangandikan

Ing jaman globalisasi punika budaya satunggaling bangsa saged kalindhih dening budaya sanes ingkang langkung prakoso. Budaya ingkang kalindhih kala wau, racakipun, budaya ingkang mboten kasengkuyung dening bebrayanipun, sauger bebrayan taksih kersa anyengkuyung budayanipun, tangeh lamun menawi satunggaling budaya badhe kalindhes budaya sanes. Makaten ugi satunggaling basa, ingkang kalebet peranganipun budaya, inggih saged kalindhih basa sanes ingkang langkung kiyat. Sumangga kita nyengkuyung budaya jawa supados budaya menika luwih luwih basa jawa mboten kalindhes dening budaya liya.

Dentyawanjana iku asale saka tembung denta lan wyanjana. Denta tegese untu dene wyanjana kuwi tegese aksara. Dentyawanjana kuwi duwe teges aksara untu ing jaman saiki, aksara untu utawa dentyawanjana iku diarani carakan, aksara hanacaraka utawa aksara jawa.
Aksara iki uga diarani aksara ajisaka, jalarane aksara hanacaraka dicundukake karo dongeng lelakone ajisaka. Isine dongeng nyritakake kasetyaning dora lan sembada marang ajisaka nalika jaman prabu dewata cengkar.
Dongenge mangkkene :
Hana caraka : ana carakan ( duta, yaiku dora lan sembada minangka utusan saka ajisaka )
Data sawala : ( duta loro ) padha sulaya utawa gegeran ( sing siji netepi prasetya njaga pusakane ajisaka, sing liyane diutus njupuk keris )
Padha jayanya : padha sektine, padha digdayane, padha jayane ( ora ana kang menang utama kasoran )
Maga bathanga: ( wusana ) padha dadi bathang ( mati, sampyuh, mati bareng )

SESANTI :

Mangajapa marang gebyaring kadonyan
Ning aja nglunturake kejatening paseduluran

Mangajapa marang samu barang kawruh
Ning aja ndadeake gedhening pangrasa

Mendet saking : http://dwisyaefulmujab.blogspot.com/2009/06/seratan-jawi.html

Facebook Napa Twitter ?

2009-12-19T05:45:00.000-08:00

Jaman ingkang sampun maju andadosaken perkembanganipun teknologi internet kangge nyambung tali silaturahmi sangsaya gampil. Kadosto Facebook utawi Twitter ingkang samangke saged paring atur dhumateng rencang utawi kaluargi ingkang sampun dipun lebetaken wonten ing komunitasipun.

Facebook utawi Twitter wonten keunggulan lan kelemahan piyambak-piyambak. Manawi kula nggih pilih kekalihipun amargi sami-sami saged paring ilmu, tambah kadang, lan sanesipun, anamung benten fasilitasipun.

Milih pundi ingkang mathuk kalian penggalihipun panjenengan?

Tentang Penelitian

2009-05-22T08:27:00.000-07:00

Blog kula sanesipun inggih menika Tentang Penelitian ingkang nembe mawon 'online'ipun. Blog menika salah satunggaling blog penelitian ingkang nyaosi pirsa dhumateng panjenengan perkawis penelitian. Penelitian ingkang kula maksud inggih menika penelitian 'akademis' khususipun 'skripsi'.

Panjenengan saged maos artikel perkawis skripsi, proposal, presentasi, sidang skripsi, format skripsi ingkang leres, menapa malah kersa ngundhuh presentasi ingkangkula serat wonten format 'Power Point'. Blog Tentang Penelitianm menika kaserat ngangge basa Indonesia.

Kangge panjenengan ingkang sakmenika hambok bilih nembe ngayahi jejibahan ndamel tugas akhir, saged rawuh wonten blog kula menika. Katuran pinarak tuwin dipun sekecakaken anggenipun maos-maos artikel wonten ing blog tentang penelitian menika.

20 Dollar Saben Dinten ??

2009-05-20T07:13:00.000-07:00

Kepinginan pikantuk 20 dollar saben dinten liwat internet menika penghasilan ingkang lumayan 'wah' kangge kula. Ingkang awrat sanget inggih menika ngancik 20 dollar saben dinten.

Strateginipun inggih menika nyerat tulisan ingkang sae saking wiwitan. Syaratipun inggih menika :
1. Ngertos lan nguasai kode-kode HTML kaliyan CSS .
2. Ngertos lan nguasai pemrograman komputer (php, asp, java script, lsp.)
3. Kedah sanggup lenggah wonten ngajeng komputer kangge nyerat artikel jam-jaman (3-6 jam kemawon) saben dinten.
4. Kedah sanggup browsing internet 'minimal' 3 jam saksampunipun 3-6 jam nyerat artikel.
5. Gadah nilai TOEFL 'minimal' 350. Menika ukuran kula kangge nyerat artikel bahasa inggris kanthi langkung sae.
6. Mboten gadah kepinginan nggayuh 20 dollar saben dinten rumiyin.
7. Grapyak kaliyan tamu ingkang rawuh wonten situs / blog panjenengan.
8. Niku rumiyin dipun lampahi. ^_^

Salajengipun kula paringi tips malih wonten ing bagian 2. maturnuwun ...

'Gresek' Dollar

2009-05-20T07:09:00.000-07:00

Kados pundi menawi panjenengan gadah kepinginan ajeng pados arta dollar saking internet?

Sakmenika sampun kathah sanget program saking internet ingkang nawaraken pados dollar. Kadosta program PPC, PTC, review, PPR, Taking Survey, affiliasi, Sade Ebook, Pasar Valas lan sanesipun.

Ingkang wigatos, program kaserat nginggil menika saged dipun lampahi wonten dalemipun panjenengan. Dados mboten sah kangelan anggenipun 'gresek' dollar menika. Namung mbetahaken komputer, kaliyan piranti kangge 'akses' internet. Ingkang mboten nyambut damel wonten panasan lan ngangge tenaga, pados dollar kanthi cara menika mboten sah dipun penggalih.

Semanten ugi kula ingkang sampun nyobi bilih pados arta kanthi cara menika 'relatif' gampil. Mboten medal tenaga namung pikiran 'terkuras'. Sinambi lelenggahan selonjor, nyruput kopi, ngrahapi sakwontenipun, nglecis, wah jan uenak tenaan...

Ingkang kepincut monggo sesarengan kula pados arta dollar liwat internet. Halal lan mboten ndadosaken tiyang sanes rugi. Maturnuwun ...

Mas-aripp

2009-05-10T07:21:00.000-07:00

Blog Mas-Aripp kalebet blog utami kula ingkang sampun 'online' sawetawis wekdal. Sejatosipun blog menika kangge sinau lan andum ngelmu tumrap sasami. Senajan taksih dereng sae, ananging sesarengan wekdal ingkang mlampah blog Mas-Aripp dipun sampurnakaken saengga saged maringi 'wawasan' para pamiyarsanipun utawi sedherek ingkang rawuh dhateng blog Mas-Aripp.

Mas-Aripp sakmenika sampun nyerat maneka warni wonten blogipun, kadosta technology, space, world news, environment, health, money maker, kaliyan blog. Kategori-kategori menika kalebet kategori ingkang Mas-Aripp remen lan saged paring pengetahuan ingkang kathah tumrap Mas-Aripp piyambak. Menawi sasampunipun maos artikel blog Mas-Aripp dipun sumanggakaken nyerat atur ingkang wonten gandhenganipun kaliyan artikel menika.

Prayoginipun, menawi sampun kersa rawuh wonten blog Mas-Aripp, panjenengan kula aturi rawuh wonten ing blog sanesipun. Inggih menika Tentang Penelitian, Home Decorations, Arts and Crafts, Free Ebook, kaliyan Free Template. Maturnuwun ...

Font Aksara Jawi

2009-05-03T06:38:00.000-07:00

Menawi badhe nyerat aksara jawi wonten komputer, sampun wonten aksaranipun (mbok bilih sampun mangertos sakderengipun). Mas Teguh Budi Sayoga 2005, ndamel aksara jawi ingkang saged di agem wonten Microsoft Word, Notepad, Photoshop, lsp. Tuladhanipun wonten ngandhap :

Aksara menika dipunlebetaken wonten program Pallawa saengga saged ngasilaken teks ingkang sampun ‘berstandar ANSI’. Ateges saged mlampah wonten Sistem Operasi Windows program menapa kemawon .

Caranipun ‘nginstall’ kados ngandhap menika :

1. Explorer à padosi wonten pundi folder simpenan font hanacarakanipun panjenengan ingkang sampun dipun undhuh. Menawi dereng ngundhuh, klik MRIKI.
2. Kopi File Hanacaraka Sanskrit, Hanaj_0, lsp. (ingkang ‘ekstensinipun’ TTF)

3. ‘Paste’ wonten C:\WINDOWS\Fonts

4. Mangke wonten ‘proses instalasi font’ . Panjenengan tengga ngantos komplit.
5. Font hanacaraka sampun saged dipun agem.

Panjenengan kedah latihan rumiyin supados saged lancer anggenipun nyerat aksara menika. Sedaya pitulung utawi cara-caranipun wonten menu program pallawa.

Ngundhuh Fonts Hanacaraka klik MRIKI mawon. Utawi saged klik gambar wonten ‘sidebar’ sisih tengen menika.

Maturnuwun ...

Nyerat Aksara Jawi

2009-05-03T06:34:00.000-07:00

Aksara jawi wonten ing dinten menika sampun mboten kerep malih dipun agem kangge nyerat menapa kemawon. Senajan to mboten asring malih kaliyan aksaranipun, kula panjenengan racakipun (ngapunten) sampun mboten saged nyerat ngangge aksara jawi.Nggih mboten, Pakdhe ??

Langkung-langkung para wadya kaneman kathah-kathah sakmenika panjenengan kengken supados nulis naminipun piyambak ngangge aksara jawi, limrahipun inggih mboten saged saestu. Lha biasanipun menawi nyerat ngangge aksara latin, lajeng dikengken kados mekaten.

Wonten ing Sekolah Dasar kaliyan Sekolah Menengah Pertama rumiyin inggih gurunipun kula paring piwulang perkawis aksara jawi. Ananging menawi mboten dipun sinau malih lan mboten dipun agem latihan, mangke nyerat aksara jawi dados salah satunggaling perkawis ingkang awrat sanget.

Monggo kula panjenengan sampun ngantos nglalekaken aksara jawi. Menika rak inggih kalebet kabudayan jawi ingkang kedah tansah dipun lestarekaken. Nggih Pak Lik nggih??

Menawi kersa ngundhuh Font aksara jawi kangge latihan, klik mawon link menika. Sumangga.........

Basa Jawi Ngoko

2009-05-03T06:29:00.000-07:00

Basa jawa ngoko kaperang dadi loro. Basa Ngoko-lugu karo Ngoko-andhap.

Basa jawa Ngoko lugu iku basa jawa sing tembunge ngoko, ora ana tembunge karma utawa karma inggil tumrap wong sing di ajak guneman. Dene yen ana tembunge Krama inggil mung tumrap marang wong sing digunem.

Sapa kang isa dijak guneman karo basa jawa ngoko lugu ?. Kabeh-kabehane isa, ning sing :
1. Sapadha-padha utawa kancane sing wis kulina banget.
2. Luwih enom utawa umurane sak ngisore.
3. Lagi ngunandika.
4. Durung isa guneman ganep utawa komplit. Kayata bocah ciik sing lagi ajar ngomong.
5. Sing ora isa guneman karo basa liyane. Kayata R.Bratasena.

Tuladha : Iki ana salah sawijining blog sing basa pengantare karo basa inggris. Jenenge mas-aripp blog. Blog iki digawe supaya isa mbiasakake maca, lan gawe tambah mudeng basa inggris.

Ewadene basa jawa Ngoko andhap iku basa kang alus sarta luwih ngajeni. Wujude ngoko andhap yaiku basa ngoko kecampur tembung krama inggil tumrap wong kang diajak guneman. Yen dirasa kurang ngajeni sok dicampur karo basa krama sawetara.

Sing isa diajak guneman yaiku :
1. Bojone priyayi marang sing lanang.
2. Priyayi marang priyayi sing wis akrab tur kulina ngoko-ngokonan.
3. Sedulur tuwa marang sedulu enom sing luwih dhuwur derajade.

Basa ngoko andhap kaperang dadi :
1. Antya-basa : wujude mung tembung ngoko lan krama inggil.
Tuladha : Dik, aku nyuwun ngampil kagungane dienggo rong dina ya?

2. Basa-antya : wujude tembung ngoko, krama inggil lan krama.
Tuladha : Mas, aku ora isa nyaosi apa-apa marang panjenengan, kajaba mung isa nderek bungah nek wingi kae panjenengan ulang tahun.

Dhuwur mau tuladha ‘kekayaan’ budaya jawa bab basa. Basa liyane kayata basa Madya, Krama, lan basa Kedhaton dijlentrehne ana tulisan liyane. Matur nuwun ...

Jenenge Aji Utawa Jimat ing Pedhalangan

2009-04-30T07:50:00.000-07:00

Jimat sing dienggo lakon-lakon wayang duwe jeneng lan jenise dewe-dewe. Apa wae jenise isa di waca ana ngisor iki :

Bajrakaya : panglereman
Asmaracipta : pangasihan
Bandung Bandawasa : karosan
Cakrabirawa : sugih bala (buta)
Brajamusti : ampuhing tenaga
Naraca Bala : banjir gaman
Pancasona : ora bisa mati, angger isih tememplek lemah

Bojawara : panah angin
Jalasangara : panah banyu
Mantraniskala : panglemunan (isa ngilang)
Danurwenda : panitisan (titising ngeles)
Kalimasada : tumbaling karaharjan negara
Kembang Wijaya Kusuma : tumbal kanggo karaharjaning negara
Basusiksa : pangadhepaning kewan ( kewan isa nurut)
Lisah Jayeng Katon : weruh sing ora katon

Mugi paring manpangat ....

5 Alesan Ngapa Cah Enom Wegah Nonton Wayang !!

2009-04-30T07:44:00.000-07:00

Saiki wis ora dadi cerita maneh perkara wayang ki wis ra dadi tontonan sing menarik kanggone cah enom. Mosok arep ninggalake tinggalane Sunan Kalijaga sing dadi sesepuh jawa to?. Jaman saya maju ning budaya keteter ana mburi. Negara maju sing lali karo budayane dadi ora suwe puncak kajayane trus ambruk! ( halah..po iyo…^_^? ).

Wis langsung wae, alesane ngapa wadya bala kaneman wegah utawa males nonton wayang, kaya mangisor iki :

1.Mboseni
Wayang sing ceritane dijipuk saka cerita-cerita bharatayuda utawa Ramayana pancen akeh lakone, rumit lan gawe ora jenak le ngrungokake. Trus sing dipentasne yo mung kuwi-kuwi wae (seputar Bharatayudha lan Ramayana) ora ana perkembangan liyane.

2.Pagelarane Suwe
Biasane nek pagelaran wayang kuwi dipentasake sewengi nutuk, dadine yo suwe tenan. Ora kaya film ‘Box Office’ sing mung 2-3 jam. Sing ora kuat melek-melek bengi ya kelakon ngimpi mbuh tekan India-ne sisan kana…

3.Sindene Tuwa-tuwa
Nek sing nonton cah enom ki biasane ya golek penyanyi sing sak barakan karo deweke. Lha nek sindene (nyuwun pangapunten) yuswa tigang dasa langkung lak nggih pun ‘tante-tante’ to, Wo?? sing isih pitulas tahunan ya arang, padahal sing digoleki ya sing kuwi.

4.Ora Gaul
Gandheng cerita bharatayudha lan ramayana kuwi kedadeyane saka jaman semana, ya mesti wae durung ana tivi utawa radio. Apa maneh gadget-gadget sing pating crenthel ana ing awake cah enom-nom saiki. Gadgete ya mesti wae ‘Gadget Rujak Polo’ utawa ‘Gadget Alugara’ utawa maneh ‘Gadget Pasopati’.hehe... Ning mbiyen nek nggawa ‘Gadget Rujak Polo” ya wis gaul lho ....( ^_^ ?)

5.Ora Mudeng Bahasane (wah, parah .. lolzz)
Sing keri dewe iki sing paling marai cah enom-nom saiki wegah nek di kon nonton wayang. Ning ora gelem ngakoni. Kaya sing nulis artikel iki ya isih kangelan ‘memahami’ basa jawa kawi sing biasane dienggo Pak Dhalang. Jane nek basane kuwi kaya basa sing dienggo nulis artikel iki ya mudeng. Masalahe ora ana kebiasaan nganggo basa jawa kawi pas neng pergaulan tur ya penake nganggo basa sing ngene iki kok. Yo ora, para kanca ??

Jane ki nek wayang ‘dikemas’ dadi pagelaran sing simple trus ora ngorot-orot duit kanggo cah enom-nom pisan-pindho lak ya rapopo to, Wo? Ning ya ora terus sing miturut pakem diilangake. Justru malah ‘mendukung’! lha piye?? Ya gandheng sing nom alesane kaya sing nduwur kuwi mau, digawe wae wayang bharatayudha apa ramayana sing praktis, cepet, sindene enum-enum, bahasane simple, kaya wayang tenan. Dadine mengko TERTARIK anggone nonton wayang sing sejatine kuwi kepiye, gelem lan malah bisa melu mbantu supaya wayang ora karem ana ing jaman globalisasi!

Cekap semanten mugi-mugi manpangat .....

Primbon Jawi Jangkep

2009-04-30T07:40:00.000-07:00

"Mas, njenengan asmane sinten, lairipun dinten menapa ?. Mangke saged kula padosaken dinten ingkang sae kangge menapa kemawon. Sanesipun, menawi bilih kersa nyuwun pirsa anggenipun mlampah sakbibaripun krama kaliyan kusumaning ati nggih saged miturut petungan jawi," aturipun Mas-aripp.

Mas-e mangsuli,"Kula menika ajeng pados jodho, Mas." Mas-aripp matur malih,"O, menawi mekaten nggih saged, Mas. Tenang mawon, mboten sah dhateng pundi-pundi. Wonten mriki cekap lhe. Urusan jodho menika gampil menawi sampun ketemu. Lha ketemu sinten??? Nggih ketemu kula.hehe ... Njenengan kula caosi pirsa. Menika wonten software primbon jawi ingkang sampun langkung sae kangge pados menapa kemawon. Salajengipun kantun panjenengan piyambak. Sampun to, pokoke joss gandhozz. hehe.."

Primbon jawi menika dipun damel dening mas Johan Wijanarko, SE.Akt., saged nyaosi pirsa panjenengan perkawis maneka warni kados sifat, laku, rejeki, jodho, lan sapanunggalanipun. Langkung praktis, mboten repot 'molak-malik' halaman, cepet tur babar anggenipun njlentrehaken, mboten nyuwun 'kapasitas' ageng lan saged 'melestarikan lingkungan' amargi mboten ngangge kertas malih.

Ngundhuhipun wonten MRIKI utawi klik mawon gambar ngandhap.

Mugi paring manpangat ...

Apa Kuwi Blog Djawisedjati ?

2009-04-30T07:38:00.000-07:00

Nek nyawang blogku iki kaya-kaya ra sepiroa tinimbang blog-e kanca-kanca. Lha wong ya lagi blog anyaran tur ‘background’-e sing duwe dudu saka akademi computer. Ning ya lumayan tinimbang bok jedheg ra isa ngapa-ngapa. Blog iki tak nggo ‘posting’ bab apa wae sing penting ijik ana hubungane karo kabudayan jawa. Nek kiro-kiro ra ana hubungane, ya sing penting pengantare karo basa jawa. hehe…

Blog iki kanggo kanca-kanca sing mudeng basa jawa ben ana ‘variasi bahasa pengantar’. Biasane blog-blog neng Indonesia kene ditulis nganggo basa Inggris karo Indonesia, kaya blogku liyane; mas-aripp >>link karo tentang penelitian >> link . Jane yo ana sing gelem nulis ngaggo basa jawa, ning sithik. Dadi kekarepanku nulis blog ngaggo basa jawa ki karo sisan melu nguri-uri basa jawa khususe karo kabudayan jawa umume. Bgono lho, Pakdhe.....

Dadine nek aku nulis artikel nganggo basa jawa ya muga-muga blog-blog sing pengantare ngaggo basa jawa isa terus diminati lan saya akeh bocah-bocah utawa enom-enoman sing tertarik gawe blog basa jawa. Gaul ora gaptek karo ‘teknologi blogging’ ning ora lali karo budayane dewe. Sapa ngerti entuk rahayuning Gusti (ning iki ora ngejipke lho ...hehe..). Sing ora kalah penting yaiku isa nyalurake hobi nulis kanthi media sing ora saben uwong iso ngerti apa maneh isa. Nilai plus tersendiri to, Lur ..Sedulur ....

Mugi blog menika saged dipun tampi kaliyan 'komunitas' jawi khususipun ...

Aksara Jawi Dugi Thailand ??

2009-04-30T07:27:00.000-07:00

Aksara jawi miturut rencang kula saking negri Pattaya Thailand, dipun serat dhateng prasasti wonten mrika. Ateges sampun wiyar anggenipun kerajaan Majapahit 'ekspansi' ngantos wilayah luar Indonesia lajeng ngasta aksara hasil kabudayan jawi. Bukti tinggalanipun inggih prasasti menika.

Rikala taksih ngangsu kawruh wonten ing pawiyatan luhur, tepang kaliyan salah satunggaling mahasiswa saking pattaya. Piyambakipun sanjang menawi sak cerak dalemipun wonten tulisan peninggalan sejarah ingkang kados-kados sami utawi 'mirip' namung benten kaliyan tulisan huruf Thailand/ Tiengvet.
Raos penasaranipun sampun dipun jawab rikala ngangsu kawruh wonten ing kutha Sala sareng kaliyan kula. "Ooo..tibake tulisane cedak nggonaku kae saka Jawa kene to?" sanjange."Hiya mestine. Lha wong di gawa Patih Gajah Mada karo para prajurit saka Majapahit pas 'dolan' rana. hehe..." kula mangsuli.

Rencang kula menika sampun nate mbeta majalah tiyang nem-neman utawi 'majalah gaul' saking Thailand ingkang kaserat ngangge tulisan Thailand/Tiengvet. Gandheng kula mboten saged maos, kula kengken piyambakipun maos lajeng nerjemahne sepindah. Lah ...menawi wonten Jawa menika mboten wonten 'majalah gaul' kaserat ngangge tulisan jawa. Lha wadya kanemanipun mboten saged maos aksara jawi kanthi lancar je.... Ironis sanget menawi wadya kaneman Indonesia khususipun Jawi purun dados negari maju ananging 'nglalekake' salah satunggaling kabudayanipun inggih menika AKSARA JAWI !!

Amargi sampun kawentar wonten tlatah ingkang tebih, aksara jawi kedah dipun sinau saperlu lestari ing jaman milenia menika. Supados mboten kesupen anggenipun nulis aksara jawi >>link, panjenengan saged ngundhuh aksara menika wonten mriki >> link. Setunggal paket wonten 'Font Hanacaraka, Hanacaraka JG, Jawa Palsu, kaliyan Hanacaraka Sanskrit'. Monggo dipun 'instal' sesarengan ......

Mugi-mugi paring manpangat.....